ՀՀ նախկին արտգործնախարար Վարդան Օսկանյանը, այսօր «Կենտրոն» հեռուստաընկերության` «Ուրվագիծ» հաղորդածշարի եթերում նշեց, որ իր համար ՀՀ ԱԱԾ կողմից քրեական գործի հարուցումն անսպասելի է եղել:
«Մտքիս ծայրով նման բան անցնել չէր կարող ինձ համար ամեն ինչ եղել է անսպասելի: Ես իմ հայտարարությունների մեջ էլ հայտարարել եմ, որ քաղաքականության նման գործելաոճը ընդունելի չէ ինձ համար»,- հաղորդաշարի ժամանակ ասաց Վ. Օսկանյանը:
ՀՀ ԱԺ պատգամավորն իր խոսքում նշեց, որ իր արարքի մեջ կրիմինալ ոչ մի արարք չի եղել, և ինքը միշտ գործել է օրենքի շրջանակներում: Վերջինս զարմանք է հայտնում թե ինչու է գործը քննում ՀՀ Ազգային անվտանգության ծառայությունը:
«Զարմանում եմ, թե ինչու է գործը քննում ազգային անվտանգությունը, չէ որ ուրիշ մարմիններ էլ կան, որոնք կարող են նման բաները քննել»,- ասաց Վ. Օսկանյանը:
Իր խոսքում նա նշել է, որ «ինքը կրիմինալ չէ, և չէր կարող նման չարաշահումներ կատարել»:
«Ես նման բան չէի կարող կատարել, և ոչ էլ «Սիվիլիթասը» կաներ նման բան: Թող այն ժամանակ մտնեին մի հատ նայեին, թե այդ գումարները ոնց են ծախսվում»,- նշեց. Վարդան Օսկանյանը:
Հիշեցնենք, որ ՀՀ ԱԺ 5-րդ գումարման պատգամավոր Վարդան Օսկանյանը հունիսի 11-ին հրավիրվել էր ՀՀ ԱԱԾ` փողերի լվացման գործով ցուցմունք տալու: Նույն օրը նա հայտարարություն էր տարածել, որ իր հանդեպ տեղի է ունենում քաղաքական հետապնդում, որին հաջորդել էր ՀՀ ԱԺ փոխխոսնակ, Հայաստանի հանրապետական կուսակցության մամուլի խոսնակ Էդուարդ Շարմազանովի պատասխանը:
«Ի գիտություն պարոն Օսկանյանի` Հայաստանում քաղաքական հետապնդումների ժամանակը վաղուց անցել է»,- ասել էր նա:
Այսօր` հունիսի 12-ին արդեն ՀՀ ԱԱԾ քննչական բաժնում հարուցվել է քրեական գործ ՀՀ քր. Օր-ի 190-րդ հոդվածի 3-րդ մասի 1-ին կետի հատկանիշներով, որի դեպքում մեղադրյալը դատապարտվում է 6-12 տարի ազատազրկմամբ` գույքի առգրավմամբ:
Քրեական գործ հարուցելուց հետո Վարդան Օսկանյանը այսօր ևս Facebook սոցիալական ցանցի իր էջում գրել է, որ ինքը համոզված է, որ իր հանդեպ իրականացվում է քաղաքական հետապնդում:
Նշենք նաև, որ ՀՀ սահմանադրության 66-րդ հոդվածի համաձայն, պատգամավորին չի կարելի որպես մեղադրյալ ներգրավել, կալանավորել կամ նրա նկատմամբ դատական կարգով վարչական պատասխանատվության ենթարկելու հարց հարուցել՝ առանց Ազգային ժողովի համաձայնության:
http://www.tert.am/am/news/2012/06/13/oskanyan-urvagic/
